« Goude bezañ bet graet ma studioù e IUT Lannuon ha bezañ desket brezhoneg e-pad ur bloaz ‘meus kroget da labourat e kazetennoù ar vro. Kazetennoù dre skrid hag ivez evit ar skinwel, e brezhoneg hag e galleg. Kroget ‘meus d’ober pennadoù-enklask diwezhatoc’h, pa oan kazetennerez dizalc’h en estren broioù.

Ha pa ‘meus kroget da sevel pennadoù-enklask eo bet re ziaes din mont war-gil. Gwel a raen an holl titouroù pouezus ha ne vez ket skrivet a-walc’h diwar o fennoù abalamour n’eus ket amzer pe arc’hant a-walc’h gant ar gazetennerien. Neuze eo deuet d’un doare naturel a-walc’h ar c’hoant da grouiñ Splann ! gant ur skipailh kazetennerien a soñje ar memes tra. Un doare da genderc’hel gant labour Inès Léraud hag e vandenn-dreset diwar-benn ar bezhin glas, hag ivez da leuniañ un toull e Breizh. An diskoulm : ur media enklask lec’hel !

E 2023 on bet tutet en ofisiel gant Splann ! hag hiziv on perzh eus ur skipailh peder c’hazetennerez. Ma labour a zo ober un enklask bep bloaz hag ober war-dro ar podkastoù hag ar videoioù. Ra ma vo brasoc’h-brasañ skipailh Splann ! evit gallout sevel muioc’h mui a enklaskoù pouezus evit an dud e Breizh hag er bed. »

« Kroget ‘meus da labourat en ur lakaat ar gaoz diwar-benn ar cheu a oa tro dro d’ar raktres aerborzh e Ker-Itron-Al-Lan evit France Bleu Loire-Océan. Dedennus-kaer e oa labourat war ar sujed-se rak mesket e vefe kudennoù endroel, ekonomikel, politikel ha tro-dro d’an tachennoù labour-douar. Desket ‘meus ur bern diwar-benn penaos e oa an eskemmoù e-tre an dud hag ar mediaoù, penaos e c’hall tud zo kaout disfiz, met ivez penaos sevel ul liamm fiziañs. An-dra-se ‘neus bet kalz a bouez war ma doare da labourat.

D’un doare naturel a-walc’h ‘meus bet c’hoant labourat evit Splann !, ur media a glask labourat war an hir dermen war sujedoù luziet ha pouezus. Graet ‘meus daou enklask, unan war ar metanaat e 2022 hag unan war an tachennoù labour-douar e 2023. Adalek miz Gwengolo emaon er skipailh bemdez. Ma labour zo obert war-dro hol levrigoù enklask hag an darvoudoù e lec’h ma vez kavet hon media.

En amzer da zont e plijfe din e vefe brasoc’h c’hoazh skipailh Splann ! rak memes en ur vezañ peder e lec’h div hon eus dija re a draoù hon eus c’hoant ober : enklaskoù, darvoudoù (plijout a rafe deomp aozañ ur fest-noz !) ha mennozhioù a bep seurt evit ma c’hallfe an holl lenn, sellet pe selaou hon enklaskoù. »

« Goude bezañ graet studioù geografiezh ha kazetenniñ, ‘meus kroget da labourat e 2017 evit kazetennoù lec’hel. Dedennet on bet diouzhtu gant ar sujedoù tro-dro d’al labour-douar ha d’an endro. Lannuon, Gwengamp, Karaez… Eus Bro-Dreger betek ar C’hreiz Breizh ’meus dizoloet pegen luziet ha pouezus e c’hell bezañ ar c’heleier lec’hel. Tost-tre d’an dud eo ar c’hazetennoù seurt-se. Met dipitet on bet ivez gant an harzoù a vez gant ar c’hazetenniñ lec’hel : n’eus ket amzer a-walc’h evit labourat, al liammoù gant ekonomiezh ar vro, an diaezamantoù evit lakaat ar gaoz war sujedoù zo. Da skouer, ar sujedoù diwar-benn an agro-boued.

Ar c’hoant da gelaouiñ gant un doare dizalc’h eo ar pezh en deus bountet ac’hanon da vont en darempred, e 2020, gant ar strollad kazetennerien a oa oc’h en em vodañ evit difenn ar frankiz da gelaouiñ diwar-benn an agro-industriezh e Breizh. Ur strollad en deus krouet Splann ! un nebeut mizioù war-lerc’h.

Gopred on gant ar media abaoe 2023. Ma labour zo ober enklaskoù hag ober war-dro al lizher-kelaouiñ a vez kaset bep miz. Emichañs e vo lennet hon fennadoù gant muioc’h mui a dud evit ma vefe cheñchamantoù poellek er gevredigezh. »

« E penn kentañ, ne oe ket em fenn bezañ kazetennerez. Met bet on barzh ar jeu a-benn ar fin dre ma studioù sokiologiezh. Al liamm etre an daou : me a blija din labourat war an amzer hir evit analizañ e mod don ur sujet. Ar pezh ‘meus kavet war lerc’h e ADN Splann !. Me ‘moe labouret e Pariz gant ar media Africultures, ha tapet on bet diwezhatoc’h gant al labour enklask ba Arc’hantina, pa ‘moe klasket gant peseurt mod oe bet rastellet douaroù ar pobloù henvroat.

E Breizh on bet o chom goude-se, ha ‘meus kendalc’het d’ober enklaskoù ha reportajoù war ma anv evit mediaoù liesseurt. Klevet ‘meus anv eus Splann ! d’ar memes koulz pa oe ganet ar media. Labouret ‘meus war an enklask kentañ diwar-benn an amoniak. Er memes bloaz, ‘meus enklasket diwar-benn ar re o deus rastellet ar muiañ a arc’hant gant ar PAC (Politikerezh labour-douar boutin).

Goude-se ‘meus desket brezhoneg ha ‘meus labouret gant Radio Bro Gwened. Abaoe miz Gwengolo 2024 on e-barzh skipailh Splann ! gant Juliette, Faustine ha Julie. Labour a ran war un enklask bep bloaz ha emaon e-karg deus ar rouedadoù sokial. Emichañs vo intereset ha kizidikaet muioc’h mui a dud gant hon enklaskoù ! »