Bio gaz, ken burzhudus ha ma vez kredet ? Taget eo ar vro gant enkadenn an energiezh, ha setu neuze gouarnamant Bro-C’hall o klask diorren ar produin gaz war’r maez. Ul lezenn emañ o sevel a-benn diskargañ ar metanaat d’ur bern reolennoù endroel a-bouez. Aze ‘mañ ‘n dalc’h : pennfollet ha digoñtrolabl eo dija ar metanaat. Daoust d’ar riskloù ‘braz ‘zo a-fed yec’hed an dud, hag a-fed endro. Risklus eo ivez evit hon dour da evañ, ‘zo lakaet diaes dija gant ar sec’hor.
Setu diskoachet gant enklask nevez Splann ! ez a, e Breizh, kazi an holl metanizer dreist d’ar muzulioù surentez, a-drugarez da dirojañsoù (derogasionoù). Ha pa vez kontrollet un nebeud dioute (‘pezh ‘zo ral-kennañ), setu diskwelet ur bern muzulioù surentez ret ha ne vezont ket bet doujet gante. Koulskoude n’eo ket anavezet mat ar riskl en diflipañ kleñvedoù, peadra vefe da deurel evezh sañset.
Aon ‘zo ma vefe un diouer a voued ‘blam d’ar prantad sec’h ha d’ar brezel e Ukraina… Ha stennoc’h eo ar jeu ‘blam d’ar metanaat : ganti ‘vez lonket bern plantennoù ‘giz ar maiz, ar pezh a lak ur c’hevezerezh ouzhpenn gant an desaverien loened o deus ezhomm magañ o chataloù, hag an dud o deus ezhomm debriñ. Muioc’h mui a barkeier ‘vez implijet da c’hounit ed da bourvezin ar metanizerioù, ha kement-mañ o vont dreist d’an nebeud reolennoù ‘zo da harzañ ma ‘hafe re bell ganti labourerien-douar ‘zo.
Emañ da vat embregerezhioù braz an energiezh, o tapout gallout er menajoù hag el labour-douar. Int di ‘ar re greñvañ en diorren ar metanaat. Aon ‘zo ma vefe laeret digant al labourerien-douar an holl gounidoù, da leuniañ chakodoù firmoù ‘vel Total hag Engie. Muioc’h-mui e teuio da vout dazont hon maezioù, hon c’hleuzioù, hag hon zakadoù gleb divizet e burevioù seurt embregerezhioù braz divent.
85
a vetanizerioù bet kontrollet e Breizh e 2020 n’o doa ket bet graet al labourioù surentez ‘oant sañset d’ober.
