Gwisket e ruz eo Breizh. Kement a atantoù da zesevel loened ‘zo, hag eo Breizh ar vro an hini pennañ o tilaoskañ amoniak e Frañs. Ha gant ar gaz-se, krouet rannigoù-munud en aer… Hag a lazh dekvedoù a viliadoù a dud bep bloaz. Ankenius eo evit yec’hed an dud, ha hent all e weler sklaer dija pegen mantrus e c’hell bezañ evit an endro. Met n’eo ket evit-se emañ Breizh o toujañ eus sturiadoù Europa da geñver an amoniak : war washaat e c’hello mont saotradur an amoniak en aer d’ar bloavezhioù da zont er vro. Abalamour d’ar re a fell dezhe gounit arc’hant kousto pe gousto… Ha zoken ma vez aet a-enep al lezenn gant lod a industrialourien evit en-ober.

• Bro Vreizh eo an hini e lec’h ma vez dilaosket ar muiañ a amoniak e Frañs. Eus magerezhioù loened ez-douar e teu ar gaz-se dreist-holl, ha ganti e vez krouet rannigoù-munut en aer. Kablus int e kleñvedoù ar skevent, ar galon ha krign-bev.
• Miliadoù a dud a vez lazhet gant an amoniak bep bloaz er Stadoù-Unaned, hervez ur studiadenn nevez. E Breizh e c’hellfe bout kement all.

Re vunut e chom an aozadurioù a zo e karg da evezhiañ ouzh kudenn an amoniak e Breizh. Re vresk ivez an dibaboù politikel war an afer.

• Tapet bern arc’hant publik gant darn eus an embregerezhioù saotrus-kenañ gant amoniak.
• Kumuniezh kumunioù ‘zo a ra a c’hontrol-mik eus ar pezh a vez goulennet gant sturiad Europa da geñver saotradur an aer.
• Raktresoù boued ha bevañs braz a lako ar saotradur da vont war washaat e Breizh, daoust da alioù Pennadurezh an Endro.

• E-pad 15 vloaz da nebeutañ e bet kuzhet an temz nitrogenek produet gant an Timac.
• Dilaosket eo bet muioc’h a amoniak gant an Timac eget ar pep brasañ a zo aotret gant al lezenn, gwechoù ‘zo etre 2017 ha 2020.
• Ankeniet eo kevredigezhioù ha medisined lec’hel ‘zo abalamour da saotradur an amoniak.