Ur metanizer kudennek sañset da vezañ reizhet gant an hini a c’hallfe ’bout penn-kaoz ar c’hudennoù
Unan eus metanizerien savet gant Evalor en Aodoù-an-Arvor n’eo ket bet graet hervez ar reolennoù… Labourioù a zo ret ober war ar savadur evit ma vo hervez lezenn. Ar pezh a zo eo Evalor ar stal a zo bet fiziet enni ar garg da briziañ al labourioù dresañ zo bet kaset ! Biskoazh kemend all… En daou du emañ Evalor neuze !
Sachet e oa bet evezh gant ar prefeti war ar gudenn e 2021 ouzh metanizer SARL CH4 Energie, e Pleneventer (22), abalamour da « gudennoù braz a lake en dañjer surentez an dud hag an endro ». E miz Here 2022 ‘oa bet klevet kaoz c’hoazh eus ar metanizer-mañ e Kuzul an departamant war riskloù evit an endro, ar yec’hed hag an deknologiezh (Coderst).
Hervez ar C’huzul e teu ar c’hudennoù-mañ eus an doare m’eo bet soñjet ar metanizer (traoù torret pe n’ez a ket mat en-dro). Peadra da lak diaes al labourer-douar ‘zo perc’henn war ar savadur. Padal eo fier-ruz Evalor, an hini ‘neus savet ar metanizer, da embann eo-eñ « embregerezh gentañ a sav metanezerioù e Breizh ».
Ha piv eo prezidant nevez an embregerezh-mañ abaoe miz Even 2022 ? Philippe Bizien an hini eo, ‘zo bet ivez prezidant Komite rannvroel ar moc’h, ha war an dro prezidant an embregerezh Evel Up, ‘zo eil kevelouri moc’h (kooperativ) e Bro Frañs. Perc’hennet eo Evalor da 70 % gant Evel Up. Hag ivez, evel-just, Philippe Bizien eo perc’henn atant moc’h braz divent Avel vor, e Landunvez (29), a oa bet lakaet war wel gant enklask Splann !.
« Paeet eo ganin al labourioù zo bet lañset a-benn reizhañ an traoù », eme perc’henn ar metanizer dirak ar c’h/Coderst. Evalor eo an hini a raio ur sell war al labourioù ! Douetañs en deus ar C’huzul e vo gouest steuñv ekonomikel ar metanizer en dazont, met memes tra eo bet divizet ganto leuskel ar metanizer da vont en-dro, an nebeutañ posubl, da c’hortoz e vefe reizh. Ha piv ‘zo e karg da wiriaat e vo ar metanizer diouzh ar reoladoù ur wech echu al labourioù ? Evalor, evel-just !
Savet hon eus un nebeud goulennoù da Evalor. « Ganeomp-ni eo bet graet hon eus war-dro an traoù teknik ar metanizer, met n’eo ket bet ijinet penn-da-benn ganeomp. » Hervez Isabelle Robin, a zo penn karg an embregerezh, n’eo ket dre faot dezho ‘zo kudennoù gant ar metanizer, estreget hini an alarm surentez.
102
An niver a vetanizerioù a zo savet pe da vezañ savet gant Evalor. Ar bras anezho a zo hag a vo e Breizh.
« Gwelloc’h ‘vefe bet kaout un embregerezh dizalc’h da heuliañ an teuliad, rak ar mod eo bet savet ar metanizer gant Evalor a c’hallfe bout kaoz ar c’hudennoù teknik. »
eme Francis Nativel, sekretour meur Dour ha sterioù Breizh. Tennet eo ar frazenn-se diouzh rentañ kont gant ar c’h/Corderst embannet d’an 13 a viz Here 2022.
Lennit hon enklask war ar metanaat
Resevit bep miz danvezioù nevez flamm dre vail ha bezit kelaouet eus hon enklaskoù nevez, e brezhoneg. Digoust eo ! (e galleg amañ)