Bloaz zo zo bet embannet un enklask gant Splann ! diwar-benn ar raktresoù savet e Amerika ar Su gant Iberdrola, un embregerezh braz abominapl eus Bro-Spagn a brodu energiezh. Ar stal se eo an hini zo o sevel an tourioù-avel e bae Sant-Brieg.

Ur bloaz warlerc’h eo aet hon c’hazetennerez Itzel Marie Diaz war an dachenn da welet pegen fall eo deuet ar jeu. He reportaj zo bet embannet gant Reporterre. Diskouez a ra e kaver memes kudennoù c’hoazh. Ugent vloaz goude m’ eo bet plantet tourioù avel gentañ Iberdrola e chom re-gêr an tredan. Gourdrouzoù ha dañjerioù surentez zo ivez… Ouzhpenn 2 000 tour-avel zo er vro ha n’eo ket ar re zo o chom eno a denn o mad anezho.
E La Ventosa ‘oa bet prometet gant an embregerezhioù e vefe postet arc’hant ‘bar skolioù, ‘ban ospitalioù ha kement zo. Met n’eo ket bet graet tamm ebet. Ha gwasoc’h zo c’hoazh. C’hoant o deus embregerezhioù all en em staliañ eno. Da skouer, EDF zo en soñj sevel Gunaa Sicarú, ur raktres nevez da sevel tourioù-
avel. « Kalz arc’hant zo ‘bar jeu. Ganeomp-ni, paisanted bihan, ‘neus ket tu nac’hañ feurmiñ hon douaroù d’an embregerezhioù se. A-hend all e oaromp e vimp gourdrouzet a dra sur », eme Germán Valdilvieso, 30 vloaz anezhañ. Rediet eo bet feurmiñ an nebeud douaroù zo gantañ da EDF.
Ouzhpenn business an avel zo er vro. Ur raktres sevel un hent braz da eskemm marc’hadourezh etre Amerika an Norzh hag Amerika ar Su (corridor interocéanique e vez graet eus se e galleg) zo studiet er mare mañ. Ret e vefe neuze brasaat an hentoù-houarn, sevel hentoù nevez , porzhioù, uzinoù ha memes sevel ur gazoduk… « Kenderc’hel a reomp da stourm a-benn mirout hon bro ha leuskel d’hon bugale ur bed e-lec’h ma c’haller bevañ », eme Rodrigo Flores Peñaloza, an den ‘neus savet an APIIDTT, Bodadenn pobloù ar strizh douar da zifenn ar vro.