Dre al lezenn-se e vo goulennet gant ar strollegezhioù renabliñ e-barzh teuliadoù aozañ an tiriad (da skwer, ar PLU) an takadoù a vo gouestlet d’ar produiñ energiezh padus (tourioù-avel, panelloù heol, met ivez metanizerioù…). C’hoant en doa ar gouarnamant e yafe « buanoc’h » an doserioù da sevel raktres-mañ-raktres, hag evit en ober e vo roet an tu da seurt raktresoù da chom hep doujañ diouzh reolennoù ‘zo. Evel Lezenn an Aodoù (loi Littoral), ha reolennoù gwareziñ ar vev-liesseurted.

Aon o deus an Ekologourien e vefe re vresk ar muzulioù ‘zo sañset da harzañ ma vefe lonket gorreadoù braz a barkeier, lanneier, ha koadoù gant kreizennoù panelloù heol.

Skwerioù ‘zo dioñte dija e Breizh : 35 devezh-arat (17 ha) a douaroù labour-douar vo implijet da broduiñ tredan diwar an heol er Folgoad (29), ‘kichen Lesneven, ar pezh a lak en fulor ar c’henstrollad Salen 29.

E Bro-Leon bepred e vo staliet panelloù ivez war ur c’hoad, en Gwiglann, ne bell Landivizio. Digoret an enklask foran ar miz-mañ. E koad Lanoue (56), setu da dourioù avel uhel-mat d’en em staliañ e plas d’ar gwez, en desped da vuzulioù gwareziñ spesadoù ’zo.

Hag el Laz, er Menezioù Du, e-kreiz un takad naturel a-bouez a-berz al loened hag ar plantennoù gouez (Znieff), da lanneier da leuskel plas da banelloù heol Total Solar, ‘zo un is-embregerezh da d/Total, hag a zo bern raktresoù all war ar stern e Breizh.

Un dra a-bouez n’eo ket bet kaoz doc’h outi el lezenn : digreskiñ kalz ar c’hementad a energiezh a vez koñsumet gant hon c’hevredigezh.

60

Sed aze an niver a spesadoù loened gwarezet ‘vo graet drouk outo gant raktres tourioù avel e koad Lanoue. Gant ar prefed eo bet asantet mont dre lezenn an endro e 2015.