Ha lammet o dije kuit an holl stankelloù ? Peadra zo d’en em c’houlenn pa weler ur penn bras eus ar politikerezh e Breizh oc’h ober stourmer penn-pellañ gant ur media enklask dizalc’h.

Kregiñ a ra an afer d’an 3 a viz Kerzu e stal-labouradeg Armor-Lux e Kemper. Pedet oa bet 200 penn-embregerezh gant prezidant kuzul departamant Penn-ar-Bed, Mael de Calan, foug ennañ o kinnig dezho e bolitikerezh sokial. Pedet oa bet kelaouennerien eus Ouest-France hag an Telegramme. Padal e voe miret ouzh reoù Splann ! da vont e-barzh ar sal da selaou ar brezegenn. War ar parkva en deus klasket un ajant surentez kemer hor c’hamera zoken.

E lec’h kondaoniñ ar fed e vije bet miret ouzh kelaouennerien d’ober o labour, e ya prezidant an departamant betek embann goude-se war d /Tebeo ha war Ici Breizh Izel ez eo Splann ! « ur media stourmer » ha « deus an tu-kleiz pellañ ». Daoust ha liammet eo gant ar reuz a zo o kreskiñ goude m’hon dije diskuliet ar c’hudennoù o deus ar beizanted vihan e-keñver an RSA.

Estreget an afer-se a zo. E-kerzh hon enklaskoù diwezhañ eo bet start deomp kaout keleier digant an dud a c’halloud. Direnkañ a ra Splann ! Ne vez ket respontet d’hor goulennoù, ne vez ket roet emgavioù deomp, hag hor posteloù a chom direspont.

N’omp ket souezhet gant kement-se : skrabañ ha disklenkañ n’eo ket ar mod gwellañ da gaout meuleudi. Koulskoude ne reomp forzh ebet rak, ma z’eo eus ar penn-pellañ tout hor skipailh, ez eo er mod rik-ha-rik ma reomp hol labour kelaouiñ. Fedoù ha fedoù tra ken. Ha tampir ma vez direnket ar galloudoù.

A-benn tri miz e vo ar votadegoù-kêr. Ur bloaz war-lerc’h hini prezidant ar Republik. Ur riskl bras a zo e vefe ur gouarnamant eus an tu-dehou pellañ o ren ar vro. D’ar poent-se e vefe gwall gaset ar minorelezhioù, moustret war enebourien ar galloud, hag al lobioù en o bog, kreñvoc’h eget biskoazh.

Da vare ar votadeg diwezhañ evit dilenn ar gannaded e oa bet lakaet war wel pegen efedus e c’hell bezañ an enebiezh ouzh an drasterezh diouganet pa vez war un dro un emsavadeg keodedourien hag enklaskoù kelaouennerezh o tiskuliañ piv eo en gwirionez an dud lakaet war ar renk gant strolladoù zo.

A-hed ar prantad-kabaliñ o tont e stago Splann ! gant al labour gwiriekaat, evit ma vo doujet da reolennoù an demokratelezh, evit ma vo efedus an oberiantiz publik ha gwirion an ingalded etre ar geodedourien.

A-gevret e vezer kreñvoc’h : neuze e kenlabourimp gant kelaouennerien Streetpress, Vert ha Bon Pote hag e kendalc’ho France 3 Bretagne, Mediapart ha da skignañ hor pennadoù.

Fellout a ra deomp lakaat ur c’helaouenner da labourat leun-amzer war ar prantad-kabaliñ ha war ar votadegoù da zont. Setu m’hon eus ezhomm da gaout 50.000 euro a brofoù d’an nebeutañ a-raok fin ar bloaz. D’ur c’houlz ma vez gwall-gaset ar c’helaouennerezh, ez eo an arc’hantaouiñ keodedel ur mod da warantiñ ar fed omp hag e chomimp dizalc’h. Kontañ a reomp warnoc’h.

Skipailh Splann !

Tresadennoù : Denoël André