Trouz zo bet tro-dro da dem al lojeiz e Breizh da-geñver votadeg budjed kentañ ar c’huzul rannvro. 34 dilennad o deus votet a-enep ha 9 zo chomet hep votiñ.

Ouzhpenn 9 000 a dud o deus sinet, dija, ul lizher da vezañ kaset da zilennidi ar rannvro a-benn ma vo lakaet Breizh en he fezh e «takad tenn». Just a-walc’h
e oa bet lakaet ar gaoz en-dro war dem al lojeiz e kuzul rannvro Breizh d’an 15 a viz C’hwevrer. Fellout a ra d’ar rannvro postañ 9 milion a euroioù evit diorren an douristelezh e-pad an tri bloaz da zont. Se zo kaoz e c’houlenn ar strolladoù a-gleiz hag an ekologourien ma vefe kemeret e kont gant prezidant ar rannvro an holl gudennoù a zo tro-dro d’al lojeiz ha d’an touristañ er vro.

Goulennet zo ma vo lakaet e plas muzulioù evel ar re a zo bet lakaet e pleustr gant maer Douarnenez da skouer. Divizet he deus Jocelyne Poitevin (tu-dehoù) e vo paeet muioc’h a dailhoù gant ar re a zo perc’henn war eil-tiez. An diaezamantoù da gavout lojeiz er vro zo deuet da vout un tem pouezus evit an dilennidi dreist-holl pa zegas kudennoù war buhez ekonomikel an embregerezhioù. Muioc’h-mui a stalioù o deus mizer da gavout tud prest da labourat ganto. Ha komprenet o deus a-walc’h implijerien Breizh eo kalz aesoc’h sachañ gopridi pa c’haller kavout un ti a zo tost d’al lec’h labour.

Sachet o deus evezh pennoù bras embregerezhioù zo war an tem-se. Da zilennidi ar vro da zizoleiñ pegen diaes eo kavout ul lojeiz hiziv an deiz ha dezho da gompren ivez efedoù fall an eil tiez war ur marc’had a zo strizh-tre. Padal o deus dibabet ar memes dilennidi skoazellañ ekonomiezh an touristañ. Hervez Pobl Vreizh, e 2020, e oa bet feurmet 7,5 milion a nozvezhioù dre ar savennoù Airbnbn ha Homeway. Da lâret eo, muioc’h eget e rannvro Pariz.