Enklaskoù leun e zivskouarn : dizoloit podkastoù « Splann ! »

Splann ! - 04/16/2024

Abonnez-vous à « Splann ! » sur les applications de podcast

Setu Splann ! o vont war dachenn ar podkastoù ! Abadennoù ispisial e brezhoneg, enklaskoù lennet, reportajoù, atersadennoù ha kronikennoù… Pep tra da reiñ plijadur d’ho tivskouarn. Pevar heuliad a zo dija da selaou war hoc’h arloadoù podkast.

Abaoe m’eo bet krouet Splann ! ez eus bet ar c’hoant krouiñ reportajoù radio ha podkastoù enklask. Setu ma krogomp ganti hiziv ! Gall a rit adkavout bremañ hon abadennoù war hoc’h arloadoù podkast (Apple, Spotify, Deezer, Google, Podcast Index, Podcast Addict, YoutTube, Castbox, Amazon Music, Samsung Podcast, Jiosaavn, SimpleCast…), hag evel just hol lec’hienn internet.

Reoù nevez a vo o tont a-benn nebeut-tre, e brezhoneg hag e galleg.

Posupl eo bet kas ar raktres-mañ da benn a-drugarez da Eric Cervera eus ar studio Near Deaf Experience, en deus graet an enrolladennoù a-youl vat. A drugarez ivez da harp ar Redadeg pa zo bet divizet gant Kuzul ar re fur reiñ da Splann ! 15.000 € evit krouiñ podkastoù e brezhoneg. Ha dreist-holl, a drugarez d’ho harp deoc’h-c’hwi e c’hallomp krouiñ raktresoù nevez evel-se : gant an arc’hant a roit d’hor media e c’hallomp mont war-raok !

Ur bern podkastoù evit lakaat ac'hanoc'h da zizoleiñ bed ar c'hazetenniñ-enklask

Setu ar pezh a zo tu deoc’h selaou evit poent :

Enklaskoù Splann ! : e-lec’h kaout un emgav gant « Aotroù X », ho peus emgav gant Aotroù pe Intron Splann !. Pep abadenn a gont deoc’h un enklask en un douare aes ha flour. Un abadenn ijinet 100 % e brezhoneg, o kenlabourat gant Radio Breizh hag arc’hantet gant ar Redadeg 2024 !
Hon enklaskoù lennet e galleg : plijet oc’h e vefe lennet istorioù deoc’h ? Inès Léraud, Morgan Large… Kavet hon eus mouezhioù bravañ Splann ! evit lakaat ac’hanoc’h da zizoleiñ hon enklaskoù. Ur raktres bet enrollet e studio Near Deaf Experience e Lanneur (29).

Oc'h enrollañ ur podkast e studio Eric Cervera emañ Inès Léraud.

Ur sell war al lizher-kelaouiñ : bagoù bras-meurbet arc’hantet evit an treuzkemm ekologel, tud marvet war o labour, poulloù hañvouez o saotrañ an dour… Bep miz gant Radio Breizh e vez taolet ur sell war unan eus ar sujedoù bet embannet en hol lizher-kelaouiñ. Da selaou e brezhoneg.
Hor c’hazetennerien er studio : abaoe tri bloaz ho peus bet tro da selaou kazetennerien Splann ! e meur a vedia evit kaozeal eus o labour. Goulennoù ho peus c’hoazh diwar-benn un enklask resis ? Hon doare da vont en dro ? Adkavit an holl atersadennoù !
War an dachenn : kinniget e vez deoc’h dizoleiñ ar reportajoù graet ganeomp evit mont pelloc’h war danvez hon enklaskoù. Selaouit Isabelle, Sophie ha Nathalie, teir Breizhadez a gont deomp penaos int bet klañv abalamour d’an ensteudoù Essure, implantoù lakaet dezho kuit da gaout bugale.

Splann !