Ur gevredigezh mod lezenn 1901 eo an arsellva, gant kazetennerien, keodedourien ha kevredigezhioù enni. Meur a gazetenner eus Splann ! o deus kemeret perzh evit krouiñ anezhañ. An diell gentañ a zo gortozet e penn-kentañ 2025. « Ar pep diaesañ a chom d’ober c’hoazh , eme Olivier Scaglia, unan eus ar pemp ken-brezidant. Met a-benn nebeut e vo titouroù resis da reiñ. »

Ganet e oa bet ar raktres bloaz zo tamm-pe-damm, ijinet gant un ugent kazetenner bennak (eus Frañs a-bezh, o labourat evit mediaoù disheñvel) a oa memes santimant ganto : war wasaat e ya ar gourdrouzoù war ar gazetennerien, hag emañ en arvar frankiz ar c’helaouiñ. 50 den bennak a gemer perzh en arsellva hiriv an deiz.

« Labourat a reomp evit ma vefe eus un ostilh gouest da gontañ pet gourdrouz a zo, met ivez da renkañ anezho : renablet hon eus 17 doare gourdrouz. Pep hini a vo gwiriekaet gant strolladoù labour evit ma vefe sur an holl titouroù embannet. Kroget e vo al labour e miz Ebrel 2024 war an holl gourdrouzoù a zo bet adalek miz Genver », eme Cécile Dolman, kenbrezidantez. Bep bloaz e vo skrivet un diell digor d’an holl, ha kaset da Guzul Europa.

« Ar pal eo ivez e vefe sklaeroc’h micher ar gazetennerien, evit ma c’hallfe ar geodedourien kompren penaos eo ar jeu er vicher, ha perak e c’hall bezañ diaes labourat. Pouezus-kenañ eo e vefe tud ha n’int ket kazetennerien a gemerfe perzh en arsellva », eme Virgile Miletto, kenbrezidantez.