Hag ur pennad nevez Indiana Jones a vefe o tont war ar stern e Breizh ? Abaoe un toullad mizioù ez eo en em gavet e Kornôg Frañs un den tres un aventurer gantañ, hag a glask un teñzor kollet. Keith Barron, geologour Breizh-Veuriad ha Kanadian o chom e Bro-Suis, paotr tri-ugent vloaz, griz e varv ha lugernus e zaoulagad pa gomz eus aour. Emañ e penn ar start-up Breizh Ressources, diazezet en Oriant, ispisializet en enklaskoù mengleuziañ, hag en deus fiziet tri goulenn aotre enklask mengleuziañ (PERM) etre miz Gouere ha miz Here 2023.

E bal : kas da benn ar c’hlaskerezh war un dachenn en tu all da 850 km² war 42 kumun, lec’hiet etre Breizh istorel hag ar Maine-ha-Liger. Un doare-ober ha n’eo bet roet d’an dud da c’houzout nemet e penn-kentañ 2024, ha n’eo ket bet hep sachañ evezh tud ar vro koulz hag ar mediaoù.

En-ofisiel emañ an embregerezh gant ar spi kavout aour hag un daou-ugent maenad all. En tu all d’an embregerezh e kaver ur geologour klasker aour, hag un embregerezh Kanadian a vez o vestroniañ ar jeu.

Dre zegouezh eo, pa oa o lenn ar Gazetenn Ofisiel eus an 10 a viz Genver 2024, e oa bet Dominique Williams, arbennigour war ar mengleuzioù er gevredigezh Dour ha Stêrioù Breizh, o tegouezhout gant ur c’heloù tarzhus : un nebeud mizioù a-raok, un embregerezh anvet Breizh Ressources he doa fiziet ur goulenn aotre enklaskoù mengleuzian (PERM) anvet « Epona » e peder c’humun eus ar vro.

Ken didrouz all e oa bet an daou deuliad PERM a vez graet outo « Taranis » ha « Bélénos », hag a bled gant ul lodenn eus ar Mor-Bihan, an Il-ha-Gwilen hag al Liger-Atlantel.

Da skouer, Jeannick Martel, eil-maerez er Chapel-Braen (35) n’oa bet klevet kaoz eus ar goulenn PERM « Taranis » a zo war he c’humun, e miz Gouere 2024 nemetken, da geñver ur c’huzul-kêr.

Evit pezh a sell ar goulenn aotre « Bélénos », bet fiziet e miz Here 2023, diskoachet e oa bet ha lakaet war-wel d’an holl dre ur pennad gant Ouest-France diouzh ar 16 a viz Mae 2024, hag a gonte an diviz war an danvez-se e kerzh kuzul Anjev Bleu Kumuniezhioù.

Petra a ouezer e gwir diwar-benn ar goulennoù aotre PERM bet fiziet ha chomet pell diouzh selloù an dilennidi hag eus an dud ?