Leusemioù bugale : un enklask nevez o kregiñ e Breizh

Emaon o sevel ur raktres evit studiañ efedoù ar produioù pistrius war deroù ar c’hleñved. Ober a ran ar prouadoù-se war besked zebr. Ret eo gouzout e teu leusemioù ar vugale diwar ar c’hemmoù a c’hoarvez e-pad ar prantad dougen. Neuze e klaskan sellet war va fesked penaos e cheñch molekulennoù ar grouell er vi pa vez eus produioù pistrius. Da c’houde e c’hallan studiañpenaos emañ ar jeu gant ar pesked a-hed o buhez. Gouzout a ran e c’hall bezañ iskis kaozeal eus pesked, met implijet e vez kalz al loened-mañ evit studiañ al leusemioù.

Pa vez meur a familh bugale klañv enno e lec’hioù zo, e c’heller soñjal int bet taget gant produioù pistrius bet alanet gant o mamm pa oant dougerez en trowardroioù, produioù hag o deus un efed war liesadenn kelligoù ar gwad, evel ma c’hoarvez gant ar pesked pa reomp prouadoù warno.

Da gentañ emaon o vont d’ober prouadoù gant molekulennoù a oaromp dija int kaoz eus leusemioù, ha da c’houde e c’hallin klask gant ar molekulennoù a c’hell bezañ kavet er c’hlusterioù.

Tost dibosubl eo prouiñ al liamm-se gant tud rak rankout a rafemp lakaat tud da vezañ klañv a-ratozh-kaer ha se ne c’hallomp ket ober evel-just. Met daoust ma n’eus ket eus prouennoù sur da vat e rankfe bezañ eus ur bennaenn diwall, o c’houzout ne c’hellomp ket prouiñ muioc’h.

Gant an enklask nevez emaon oc’h ober e vez titouroù skiantel nevez hag a vo kemeret e kont spi em eus gant ar galloudoù publik. An holl ditouroù hon eus a y’a war ar memes tu. N’eo ket ur brouenn e vo memes efedoù war an holl vugale o vevañ e-kichen gwini tretet gant pestisid-mañ-pestisid. Pismigañ a c’heller ober atav war ar fed eo disoc’hoù war besked ha n’eo ket war an dud. Met memes tra e produomp titouroù skiantel gwirion, peadra da gompren peseurt produioù a zo risklus evit yec’hed an dud. Emichañs e vo klevet kement-se gant an ensavadurioù a gemer an divizoù.

D’am soñj e vefe ur bern familhoù laouen gant seurt benveg, ya. O-unan emaint gant bugale klañv hep kompren perak. N’eus ket kalz a ostilhoù ganto. Ne vezont ket klevet. Gant medisined zo ne vez ket kemeret e kont riskloù an endro tamm ebet. D’am soñj ne vez ket kemeret mat e-karg seurt traoù. Neuze, ma c’hallfe bezañ d’an nebeutañ tud o selaou ar familhoù e c’hallfe bezañ ur sikour psikologel a-bouez.