Nevez zo, goude mizvezhioù a dabutoù, eo bet adskrivet an diell a renabl ar pezh a lak an dud da vezañ er renk kentañ evit kaout tachennoù labour-douar (Schéma directeur des exploitations agricoles, SDREA).
Hir eo bet skrivañ an SDREA nevez, met setu ar prefed oc’h embann an diell d’an 29 a viz Du 2023. Soñj ho peus ? Reolennoù evit gouzout penaos e vez rannet an tachennoù labour-douar eo an diell-se. Kaoz e oa dioutañ en hon enklask « Brezel ar parkeier » bet embannet e miz Gwengolo 2023. Da skouer, sañset e vo roet ar plas d’unan bennak en deus c’hoant en em staliañ, e-lec’h brasaat un atant, pe d’unan a ra gant ar bio e plas unan a ne ra ket. Gant servijoù ar Stad, Rannvro Breizh ha labourerien-douar e vez adskrivet an dokumant-se bep 5 bloaz.
Petra zo bet cheñchet neuze ? Staliañ labourerien-douar nevez da gentañ, setu ar pep pouezusañ. A-raok e oa e pevare plas. Roet e vo ivez muioc’h a blas d’ar bio ha d’ar geot evit magañ al loened a-benn ma ne zeufe ket da vezañ re vras atantoù pe menajoù Breizh. Hag aesoc’h da dreuzkas neuze. N’eo ket laouen tamm ebet an FNSEA gant an diell-se, pa lâr eo « lakaet en arvar labour-douar ar Vro ». En tu all, evit Konfederasion ar beizanted, an dokumant a zo « un trec’h evit ar beizanted hag a re o deus c’hoant en em staliañ. Un nebeud eus ar reolennoù nevez a vo mat da implijout evit chom a-sav gant sevel atantoù bras divent ».
Ne vez ket c’hoariet atav hervez ar reolennoù
Sklaer a-walc’h eo reolennoù skrivet en SDREA. Padal hon eus diskouezet gant hon enklask ne vez ket atav c’hoariet hervezo siwazh. Evit bezañ resisoc’h, an diell-se a servij evit un drederenn eus an degouezhioù hepken. A-drugarez d’ur bern testoù hon eus gellet kompren petra a c’hoarvez er maez eus al lezenn. Pellgomzadennoù ingal, gourdrouzoù, ober aon, dispriziañ, abafaat, pep tra zo aotreet evit lakaat a-gostez unan all zo war ar renk. Gant lod eus al labourerien-douar a glask en em staliañ eo diaes ar jeu, ha ne vezont ket soutenet a-walc’h.
Ha zoken evit ar re a ra hervez ar reolennoù atav e c’hell bezañ diaes-kenañ tapout tachennoù labour-douar. E Breizh eo deuet da vezañ brudet skouer Karim Arab. E 2018 en doa tapet an aotre d’en em staliañ ha sevel deñved bio. Met ul labourer-douar all en doa tapet an aotre ivez. Ha hennezh all a vo an hini kentañ da gaout ar parkoù.
War baper ez a ar maout gant Karim Arab ; war an dachenn ez eo Gaec ar Ruais an hini zo e-barzh ar park. Ar saver deñved az a dirak al lezioù-barn, hag e miz Genver 2022 e vo roet rezon dezhañ gant lez-varn galv melestradurel Naoned. Gaec ar Ruais a ya a-benn ha sezisañ a ra ar C’huzul Stad. D’an 12 a viz Kerzu 2023 eo bet nullet dibab lez-varn Naoned a roe ar gwir gant Karim. N’eo ket echu an afer c’hoazh…
