[Keloù « Splann ! »] Posubl e vo lakaat al labourerien rannvloaziat da zastum legumaj 13 devezh da heul hervez al lezenn

D’an 10 a viz Gouere 2024 zo bet embannet un dekred nevez diwar-benn « an taolioù-labour ne c’hallont ket bezañ ampellet ». Da skouer : « dastum legumaj pe frouezh gant an dorn, hervez ar reolennoù AOC pe IGP » (Appellation d’origine contrôlée ha Indication géographique protégée e galleg). Hervez an dekred e vo moien tennañ kuit un devezh diskuizh bep 30 devezh digant al labourerien-se.

Goulennet eo bet e vefe eus an dekred-mañ gant dilennidi Horizons, LR hag RN, diwar c’hoantaoù gwiniennerien zo a fell dezho aozañ al lusk-labour hervez azvded ar rezin. Sinet eo bet an destenn gant ar ministr kentañ daou zevezh goude disoc’hoù an dilennadegoù diwezhañ. Nebeutoc’h a wirioù sokial a vo evit labourerien all da heul, en o zouez ar re a zastum pimant eus Ezpeleta, ognon dous eus Cevenas… pe c’hoazh koko Pempoull amañ e Breizh.

Kadarnaet eo bet ar c’helou-mañ deomp gant pennadurezh Aodoù-an-Arvor e-karg eus al labour hag ar c’hengred. Dastumet e vez ar fav sec’h-se e 85 kumun eus Bro-Dreger.

« Ur wech adarre e vez roet muioc’h a-bouez d’an ekonomiezh eget da yec’hed al labourerien », eme ar sindikad Solidaires, o tegas da soñj e oa marvet 6 den war pa oant o vendemiñ warlene.

« Riskloù bras zo evit ar yec’hed pa ranker labourat dindan an heol kraz », eme CGT Aodoù-an-Arvor eus he zu. Aon gant ar sindikad ivez e y’afe da get an emglev bet sinet goude un hir a stourm ouzh an FDSEA.

Abaoe 2017 e vez jedet ar gopr kriz hervez devezhioù labour 7 eurvezh, gant ma vez dastumet 120 kg a fav bemdez. Arabat d’ar c’hopridi bezañ paeet izeloc’h eget ma vefent gopret dre an eurvezhioù labouret.

« Ne vez ket kemeret e kont an eurvezhioù graet ouzhpenn gant an emglev bet sinet e 2017. Padal ma vez tennet kuit devezh diskuizh ar Sul e vo eurvezhioù ouzhpenn dre ret », eme ar CGT. Gant ar sindikad e vez goulennet e vefent kemeret e kont, d’an nebeutañ. Hervez ar pezh a ouezomp, n’eus bet lavaret netra diwar-benn an afer evit poent, na gant an FDSEA 22, na gant Les Maraîchers d’Armor (Union des coopératives de Paimpol et Tréguier a-raok).

Peurliesañ e vez dastumet ar c’hoko Pempoull gant labourerien-douar a orin eus an estren-vro, eus Kornog Afrika dreist-holl. A-wechoù ne vez ket a baperioù ganto. Ar pezh a dalv e vez diaes dezho stourm evit o gwirioù, evel m’eo bet diskouezet gant an abadenn Envoyé spécial e miz Kerzu 2023.