Ar CRS 8 hag ar Raid bet dispaket, dronoù ha tankoù er straedoù… Biskoazh ne oa bet gwelet kement a vinvioù polis e kêr-benn Breizh evel etre miz Mae 2023 ha miz Ebrel 2024, hervez Arsellva frankizioù publik Roazhon (Orlib), e labour dezhañ o vezañ bet direnket ouzhpenn.
Gant ar manifestadegoù en enep da adreizh al leveoù pe c’hoazh gant ar re evit ar peoc’h e Palestina, kêr Roazhon a zo bet feal d’he hengoun stourm. Meur a nozvezh dispac’h zo bet war-lerc’h marv paotr yaouank Nahel e Nanterre, ivez. Ar gêr a zo brudet evit bezañ neizh meur a stourmerezh eus an tu kleiz, ha dre se e vez evezhiet a-dost gant ar pennadurezhioù, war a seblant. Pezh a vez gwelet kenkoulz gant liesseurted an tropadoù polis bet engalvet evel gant roll an armoù bet implijet.
Ouzhpenn d’an traoù boas evel greunadennoù daeraouiñ, greunadennoù-tarzh, bannerioù-bolotennoù difenn, tonfaioù hag all hag all, hervez danevell vloaziek an Orlib bet embannet evit ar miz (pdf), implijet e oa bet ivez kamionoù banner-dour, dronoù evezhiañ hag un helikopter. Archerien zo o deus douget pistolennoù mindrailher ha fuzuilhoù-arsailh d’ar 16 a viz Meurzh 2023, goude ma oa bet lakaet ar mellad 49.3 e pleustr. Ur vinviaoueg hep-he-far, ha peadra da vezañ distroet da lakaat e droed da vanifestiñ da dalvezout, pezh a zo gwarantet gant ar Gonstitusion, sañset. Seul vui ma n’eo ket dispaket ar skipalhoù liammañ etre ar vanifesterien hag ar polis ken.
Labour an arsellerien a zo heudet
Tud a-youl-vat an Orlib o deus gwiriet fedoù feulster ha doareoù d’ober dilezenn a-berzh ar polis, an tropadoù lec’hel (strolladoù arbenniget evel ar BST pe ar BAC) alies. Ar feulster-se a zo bet gouzañvet gant kazetennerien hag an arsellerien o-unan.
Ar-re mañ, aes da anavezout gant o c’hazulioù hag o zokarnoù gwenn, « zo en em santet en dañjer alies abalamour da zoareoù d’ober ar polis ». Unan anezhe a zo bet gloazet un tammig e-krezh nozvezh an 29 a viz Even e karter ar Blosne gant tenn ur banner Cougar.
Krouet e oa bet an Arsellva pevar bloaz zo gant c’hwec’h kevredigezh ha sindikad, c’hoant gante difenn ar frankizioù publik, en o zouez Kevre gwirioù Mab-den (LDH) ha Sindikad an avokaded Bro-Frañs. Hiriv an deiz e seblant bezañ direnket ar polis gantañ, war a weler.
