E Pont ar Veuzenn, e-kreiz Penn ar Bed, ez eus div labouradeg Seveso e gwir. Tal-kichen ar velin-boultr vrudet, hag a vez renet hiriv an deiz gant Nobel Sport, emañ Livbag un embregerezh perc’hennet gant ar gompagnunezh svedat Autoliv. El labouradeg-se e vez fardet pezhioù evit an airbags. Lastez a bep seurt a c’hell bezañ devet war al lec’h-se ivez.

Devet vez an traoù barzh ur forn, meur a seurt siloù glaou oberiant ennañ. D’an 12 a viz Gwengolo 2023 ez eus bet gwelet dilerc’hiadoù ruz-tan ha moged dindan unan eus ar siloù. Unnek devezh goude-se e pake an tan dindan ur sil all daoust ma oa ehanet ar rann-se eus al labouradeg d’ar c’houlz-se. Gwelet vez moged gant amezeien an uzin neuze ha galvet vez ar bomperien ganto. Asambles gant lod eus an implijidi e teu a benn ar re-mañ da lazhañ an tan. N’eus ket bet re a zistruj estreget er siloù, na den ebet gloazet.

« Ar veoliad glaou oberiant oc’h en em entaniañ a c’hellfe bezañ kaoz d’an tan gwall », hervez ar BEA-RI. « Ar fed e vefe diwallet mat al labouradeg hag e vefe implijidi war al lec’h » a laka an enklaskerien da soñjal n’eus ket bet a daol droukyoulek.

Daoust ma oa bet mestroniet an tan gant daou implijad a-raok ma errufe ar bomperien, o deus renablet an enklaskerien meur a gudenn surentez : « Da gentañ n’eo ket bet galvet ar SDIS war eeun gant an embregerezh, ha goude-se an diouer a ditouroù roet dezho hag an diaesterioù o deus bet ar bomperien da vont e-barzh al labouradeg o deus lakaet dale warno. »

Evit mirout d’ur gwall-zarvoud a seurt-se da c’hoarvezout en dro, ha d’ober muioc’h a zrouk, en deus ar BEA-RI aliet da Livbag gwellaat e steuñv-diabarzh evit ar pezh a sell ouzh galv ar sikourioù hag ar reolennoù leuskel da vont-tre. Evezhiadennoù all en deus graet ar burev-enklask diwar-benn ment ar forn hag ar mod da lazhañ anezhañ.