Peseurt raktresoù ‘zo tro-war-dro e Breizh e miz Gwengolo 2025 ?

Faustine Sternberg - 09/30/2025

250101 - Terminal méthanier Montoir de Bretagne Crédit Ric Ofeu

Antadoù a enklaskoù foran a vez aozet bep ‘loaz e Breizh. Met re nebeut a dud a oar ez eus doc’houte. Gant Splann ! e vez renablet bep miz un darn eus ar raktresoù a-bouez a zo war an tiriad, da lak an dud da gemer perzh en tabut foran.

📬 Fell a ra deoc’h bezañ kelaouet war ar raktresoù zo war’r stern en ho pro ? Lakit hoc’h anv digoust da zegemer bep miz hon lizher-kelaouiñ en ho poestad-mail.

Labour-douar

Baez (35). Atant « clos des Noes » a fell dezhañ kreskiñ an niver a yer da 40.000. Kuzuliadenn foran betek ar 6 a viz Du.
Ghignin (35). Goulenn kinniget gant an EARL D’hueppe evit kaout un aotre a-fet endro da vagañ yer pounner (betek 69.008 plas) ha yar standard (betek 76.272 plas) war daou lec’h. Enklask publik betek ar 17 a viz Here.
Sant-Yuvad (22). Goulenn a ra an atant staliet e La Landelle gellout kreskiñ ha tizhout an niver a 36.000 penn-yar dozverez, hep sevel savadurioù nevez. Kuzuliadenn foran betek an 20 a viz Here.
Gwezin (35). Goulenn EARL ar Pré Vert evit kreskiñ an niver a voc’h eus 522 betek 852 a benn-moc’h kevatal. Kuzuliadenn foran betek ar 27 a viz Here.
Pederneg (22). Goulenn gant ar SCEA Armen Bre kreskiñ an niver a saout-laezh da 200 en atant. Kuzuliadenn foran betek an 20 a viz Here.
Ar Gozh-Korle (22). Goulenn a ra ar Gaec Le Milbeau kreskiñ an niver a saout-laezh da 210 en atant staliet e Kerbre. Kuzuliadenn foran betek an 29 a viz Here.

Kêr-aozañ

Ferel (35). Freuzidigezh a-zarn eus Steuñv lec’hel ar c’hêr-aozañ (PLU) asantet d’an 8 a viz Gouere 2020 evit rummañ 26 pennkêr en un tachad labour-douar. Kuzuliadenn foran betek ar 6 a viz C’hwevrer.
Ploermel (56). Goulenn aozañ, e reter tachenn obererezhioù Le Bois Vert, eizh logell a c’hell bezañ rannet pep hini anezho, evit diazezañ obererezhioù war 6,7 ha Kuzuliadenn foran betek an 3 a viz Here.
Montroulez (29). Cheñchamant e steuñv lec’hel kêr-aozañ ar gumuniezh kumunioù, renet gantañ Program lec’hel an annez (PLUI-H), evit krouiñ tachadoù gwareziñ nevez tro-dro da vonumantoù istorel. Enklask publik betek an 22 a viz Here.

Energiezh

Kornog. Raktres GOCO2 evit digarbonañ industriezh ar C’hornog, dre añchañ ar CO2 tennet eus tri lec’h industriel. Lakaet vo ar gaoz war ar mod d’e gas dre ganolioù, d’e liñvennañ ha d’e gargañ war listri e Mouster al Loc’h (porzh Naoned-Sant-Nazer) evit ma vo miret dindan zouar da viken. An embregerezhioù Heidelberg Materials France Ciments, Lafarge Ciments, Lhoist, NaTran (GRTgaz bet), Elengy hag RTE a zo er jeu. Kendivizoù en diaraog aozet betek an 19 a viz Kerzu.
Felgerieg-Veur (35). Goulenn a ra an embregerezh Grand Fougeray PV an aotre da sevel ur greizenn fotovoltaek. Enklask foran etre ar 16 a viz Here hag an 20 a viz Du.
Marc’helleg-Roperzh (35). Gant an embregerezh Photosol Développement e vez goulennet an aotre da sevel ur greizenn agrovoltaek. Enklask foran etre an 13 a viz Here hag ar 14 a viz Du.
Ploufragan (22). Goulenn un aotre sevel a ra an embregerezh IEL ENR 127 evit ur greizenn fotovoltaek rez an douar. Enklask foran betek an 30 a viz Here.
Loudia (22). Goulenn kinniget gant ar SARL LG Biogaz diwar-benn an uzin metanizañ el lec’h anvet Le Diffaut, e Loudia. Kuzuliadenn betek an 29 a viz Here.
Plouvagor (22). Goulenn a ra an embregerezh AFR 50 an aotre da sevel ur greizenn fotovoltaek rez an douar. Enklask foran betek an 3 a viz Here.

Gwarezvaoù naturel

Sulial (35). Betek ar 15 a viz Kerzu e vez aozet ur guzuliadenn e-keñver ar fed rummañ a-nevez gwern Sulial evel gwarezva natur rannvroel.
Kumuniezh kumunioù Bro-Vigouden ar su (29). Betek ar 15 a viz Kerzu e vez aozet ur guzuliadenn da geñver krouidigezh ur gwarezva natur rannvroel war devennoù ha paludoù Bro-Vigouden.
Konk-Leon (29). Ur guzuliadenn foran a vez aozet evit adwelet Steuñv merañ Park naturel mor an Hirwazh evit ar 15 vloaz o tont (2025-2040). Betek ar 15 a viz Here.

Faustine Sternberg

#Enklaskoù foran