Peseurt raktresoù ‘zo tro-war-dro e Breizh e miz Eost 2024 ?

Juliette Cabaço Roger - 08/31/2024

Kantadoù a enklaskoù foran a vez aozet bep ‘loaz e Breizh. Met re nebeut a dud a oar ez eus doc’houte. Gant Splann ! e vez renablet bep miz un darn eus ar raktresoù a-bouez a zo war an tiriad, da lak an dud da gemer perzh en tabut foran.

Fell a ra deoc’h bezañ kelaouet war ar raktresoù zo war’r stern en ho pro ? Lakit hoc’h anv digoust da zegemer bep miz hon lizher-kelaouiñ en ho poestad-mail.

Panelloù heol

Gourè (56). Divizet eo bet gant ar gumun sevel ur greizenn panelloù heol, 20 straed La Forge, war un dachenn lec’h ma z’eus bet ul lastezerezh. Savet e vo gant an embregerezh Centrale solaire Les Minières. Enklask foran etre an 2 a viz Gwengolo hag ar 4 a viz Here.
Thouarë (44). C’hoant ‘neus an embregerezh Urba 355 sevel ur park panelloù heol e Le Chêne Vert, ur vengleuz gozh aet d’an natur en dro. « Gant ar raktres-mañ ne vo ket naturel ken al lec’h », eme Aotrouniezh an endro. Ganti e vez goulennet e vefe kaset pelloc’h studiadenn endroel ar raktres. Enklask foran digor betek ar 27 a viz Gwengolo.

Steuñv lec'hel ar c'hêraozañ

Kumuniezh-kumunioù Pleiben-Kastellin-Porzhe (29). Un enklask foran a zo digor diwar-benn steuñv lec’hel ar c’hêraozañ etrekumunel. Ur gumuniezh-kumunioù 17 kumun enni. Posubl eo reiñ hoc’h ali betek an 27 a viz Gwengolo.

Betoñs war an douaroù

Gregam (56). Fellout a ra d’ar gumun sevel tiez, ur greizenn genwerzhel vras ha labouradegoù nevez e Lann Guinet war 25 devezh-arat tachennoù labour-douar. Dalc’het e vo an enklask foran etre an 9 a viz Gwengolo hag an 11 a viz Here.
Brest (29). Ur raktres takad terkañ kendivizet (ZAC) a zo e kornôg karter Lambezelleg, er Spernot, war 23 devezh-arat. Gouestlet e vo an tachennoù da obererezhioù ekonomikel. 67.000 m² zo da werzhañ evit sevel stalioù. Enklask foran betek ar 15 a viz Gwengolo.

Atantoù XXL

Trefendè (35). Fellout a ra d’ar SCEA des Prairies du Boulouée lakaat he niver a saout laezh da greskiñ eus 375 da 480. Emañ an ti-feurm en ur vro e-lec’h ma vez stêrioù saotret mat gant an nitratoù dija. « N’eo ket bet keñveriet ar raktres dibabet gant doareoù all d’ober a c’hallfe bezañ gwelloc’h evit an endro », eme Aotrouniezh an endro en hec’h ali. Digor eo an enlask foran betek ar 7 a viz Gwengolo.
Maoron (56). An EARL Saint-Michel a fell dezhañ desevel 40.000 yar da zozviñ el lec’h « Saint-Guinel ». An enklask foran a zo digor betek an 10 a viz Gwengolo.
Brandevi (56). Ar SCEA Daguifa a fell dezhañ desevel 230 buoc’h laezh e « le Féténio » Digor eo an enklask foran betek an 19 a viz Gwengolo.
Findi (35). Fellout a ra d’an embregerezh Methadiff resisaat an titouroù roet evit mont en-dro he metanizer bet savet e « La Baratais ». Diwar-benn skogoù ar c’hirri-samm o tremen hag an efedoù a vije ma vez jedet saotradur hollek ar raktresoù metanezerioù all tro-war-dro eo an titouroù. Gall a rit reiñ hoc’h ali dre internet betek ar 26 a viz Gwengolo.

Mengleuz

Ghinrouet ha Bllain (44). Fellout a ra d’an embregerezh Socalo kenderc’hel da labourat e mengleuz Barel. C’hoant he deus lakaat anezhi da vrasaat ivez. An enklask foran a zo digor betek ar 24 a viz Gwengolo.

Juliette Cabaço Roger

#Enklaskoù foran