Bodet ez eus bet ur bern tud disheñvel a-enep d’ar raktres-se : kuzulerien departamant al Liger-Atlantel (PS) hag ar Vande (LR), 12 eus ar 15 kuzulier-kêr o deus votet, hini Corcouë en o zouez, ha daou senedour. Mont a ra a-enep ali an holl dud-se Kuzul rannvro Broioù al Liger en ur zifenn ar raktres. Tost da 1.300 den o deus kemer perzh en enklask foran, ha 70% eus an alioù a zo fall. «Goulennoù a sav ar raktres-mañ evit ur bern tud, memes evit tud ha n’emaint ket o chom er vro», eme an dud e-karg eus an enklask.

«N’eo ket aes an dibab», emezo. Met choazet eo bet tu ar gounez-boued industriel en ur reiñ un ali mat d’ar metanizer. En ur skrivañ memes tra ez eus nav zra da adwelet a-raok sevel an traoù. «Netra pouezus na vefe diaes da cheñch», eme Guillaume Loir eus Nature Energy France, ezel eus Shell, da Ouest-France.

Trankil eo ar re a glask lakaat ar metanaat da greskiñ. Gant ar gouarnamant e oa bet embannet meur a destenn d’an 13 a viz Mezheven a lavar o deus droed al labourerien-douar cheñch sifroù ar pezh int kap da broduiñ bep bloaz. Evit poent e oa posubl ober-se bep daou vloaz hepken. Riskloù zo e vefe implijet muioc’h a vaiz c’hoazh evit magañ ar metanezerioù. Paeet e vo keroc’h ivez an energiezh produet.