Pa zo kaoz gant an holl d’ober espernioù, e fell d’ar strollad muiañ niver er Rannvro reiñ ur yalc’had 20 000 € d’ar gevredigezh Les Z’Homnivores. Dindan an anv-se e vez kavet ur strollad pennoù bras eus an agro-industriezh. Krouet e oa bet ar gevredigezh e 2017 « evit difenn frankiz pep hini da zebriñ ar pezh en deus c’hoant ». Da lâret eo, difenn ar fed debriñ kig, kousto pe gousto. Evit en ober e vez aozet ganti stummadurioù a-bell, skrivet enkemmadoù (amendements e galleg) pe c’hoazh klasket levezoniñ ar gannaded, evel e miz Meurzh 2024 pa oa bet aozet ur c’hendiviz er Vodadeg vroadel. Un darvoud bet paeroniet gant Antoine Armand hag a zo ministr an Ekonomiezh hiriv.

E miz Mae tremenet e oa bet embannet ur pennad ganeomp o tiskouez e oa bet roet 9 000 € gant ar Rannvro d’an agro-boued dre ar gevredigezh Spotentiel, « ul lec’h stummañ evit ar re a deuio da vezañ pennoù bras al labour-douar ». Anat a-walc’h neuze e vefe skoet en-dro ouzh dor ar Rannvro gant bed an agro-industriezh. Hag, evel m’he deus skrivet ar gazetennerez Solenne Durox, e kaver bremañ ar Z’Homnivores er jeu. Splann ! en deus lennet ar roll-labour gant listennad an traoù a vo votet d’an 2 a viz Kerzu. En o zouez e c’haller lenn, el lodenn « Harp an embregerezhioù hag al labour », ez eus bet goulennet ur yalc’had 20 000 € gant kevredigezh Les Z’Homnivores.

Ar sammad a arc’hant publik goulennet ganto a dalv tost da 12 % eus ar programm kinniget gant ar Z’Homnivores evit « brudañ micherioù ar boued hag an agro-boued », hag ivez evit « bouetañ an tabutoù war emdroadurioù filierenn ar boued ». Kement hadegas « keleier a-bouez diwar-benn ar cheñchamantoù a vez er bed-se ».

Moarvat a-walc’h e vo resevet gant al lobi-se dilun a zeu an 20 000 € emañ en sell kaout. D’ar gevredigezh da genderc’hel gant he labour « kelaouiñ » ha « kehentiñ ». Ar pezh a c’haller kavout droch pa ouier e oa bet skrivet gant ar Z’Homnivores-se, e-kerz an hañv 2023, un notenn diabarzh evit tagañ ar c’hazetenniñ-enklask diwar-benn an agro-industriezh e Breizh. Buket ganto labour Inès Léraud da skouer, pe c’hoazh levr Nicolas Legendre.

Ha just a-walc’h n’emañ ket a-du an holl gannaded er Rannvro gant ar yalc’had-se. « An arc’hant publik ne c’hall ket servijout da arc’hantaouiñ titouroù faos ha tagadennoù o lakaat diskred war labour ar gazetennerien enklask », eme Claire Desmares, prezidantez strollad an ekologourien er Rannvro, en ur pennad kaset d’ar gelaouennerien dimeurzh.