Peseurt raktresoù ‘zo tro-war-dro e Breizh e miz Even 2024 ?

Sylvain Ernault - 06/30/2024

Kantadoù a enklaskoù foran a vez aozet bep ‘loaz e Breizh. Met re nebeut a dud a oar ez eus doc’houte. Gant Splann ! e vez renablet bep miz un darn eus ar raktresoù a-bouez a zo war an tiriad, da lak an dud da gemer perzh en tabut foran.

Fell a ra deoc’h bezañ kelaouet war ar raktresoù zo war’r stern en ho pro ? Lakit hoc’h anv digoust da zegemer bep miz hon lizher-kelaouiñ en ho poestad-mail.

Atantoù XXL

Ghè (35). Gall a reoc’h reiñ hoc’h ali da geñver un atant desevel moc’h en deus c’hoant kreskiñ : an SCEA La Chesnaie Giffard. D’ar 15 betek an 29 a viz Gouere. N’eo ket dav d’an ti-feurm ober ur studiadenn endroel.
Ar Chapel-Nevez (56). An atant desevel moc’h SCEA de Bel Air en deus c’hoant mont war vrasaat ivez betek 2.434 loen. Tu zo reiñ o ali betek an 22 a viz Gouere.
Larruen (22). Krouet e vo un atant desevel yer gant 30.000 loen e Guerlosquet. An enklask foran a zo digor eus ar 1añ betek an 29 a viz Gouere.

Industriezhioù nevez

Sevigna (22). Un enklask foran a zo digor betek an 19 a viz Gouere evit ma kendalc’hfe da vont en-dro mengleuz Guitternel ha memes brasaet (500 tonen bep bloaz). Ret e vefe heuliañ gwelloc’h ar gwallzarvoudoù a zo tro-dro d’an dour, eme Aotrouniez an endro en hec’h ali.
Loudia (22). Un enklask foran a vo eus ar 1añ betek an 31 a viz Gouere diwar-benn un uzin da vreviñ koad e Les Garennes.

Kêriekaat

Pyelo/Peurloc’h (22). Un enklask publik zo da gaout diwar-benn raktres takad labour Pyelo-su etre ar 1añ hag an 31 a viz Gouere.
Brest (29). Gallout a ra an annezidi reiñ o ali betek an 10 a viz Gwengolo a-zivout raktres adnevesaat takadoù « Tarente » ha « Kergoat-Desbordes » e karter Bellevue-ribloù ar Pennfeld.
Sant-Thuriav (56). Ur raktres kreskin takad-labour Lann Velin Su a zo ha gallout a reer reiñ e ali diwar-se betek ar 24 a viz Gouere. War lec’hienn ar gumun e c’heller kavout an doser.

Puraat an dour

Meless (35). Kreskiñ ar stasion da buraat an dourioù lous war un takad naturel a vez raktreset hag e ali a c’heller reiñ diwar-benn an dra-se betek ar 4 a viz Gwengolo.
Kerniliz ha Plouvien (29). Dalc’het e vo un enklask publik betek ar 25 a viz Gouere diwar-benn ar raktres skarzhañ div stankad dour mat da evañ, ha karzhañ 22.300m3 a lec’hid.

Steuñv dizarbenn an trouz

Emañ departamant Aodoù-an-Arvor ha Kêr Gwened (56) o c’houlenn ali an annezidi diwar-benn o steuñvennoù dizarbenn an trouz en endro : peseurt takadoù ha peseurt savadurioù a zo durc’haet da drouzioù an hentoù. Betek an 19 a viz Eost e Aodoù-an-Arvor, ha betek an 23 viz Eost e Gwened.

Deuit da vezan komiser-enklaskour

Klask a zo war komiserien-enklaskourien evel bep bloaz. Gallout a rit lakaat hoc’h anv e prefeti ho tepartamant betek ar 1an a viz Gwengolo. Titouroù war lec’hienn an CNCE.

Sylvain Ernault

#Enklaskoù foran