Er bloavezhioù tremenet o doa klasket lod eus hor c’heneiled (Charlie Hebo, Le Monde Diplomatique, Les Jours) terriñ tav bras ar galloudoù publik a c’holo kevrin yec’hed fall tud Sant-Nazer, en aner. Hon tro e oa da glask kavout ur sklerijenn bennak, evit-se omp aet e darempred gant an annezidi, gant kevredigezhioù tud ar c’harterioù, medisined hag enklaskerien, ha goulennataet ar prefeti ha dilennidi ar vro ivez.

Da geñver hon enklask bet kaset da benn etre miz Here 2023 ha miz Mae 2024 hon eus kaset da benn en tu all da 60 pennad-kaoz evit klask muzuliañ efedoù ar saotradur industriel war yec’hed an dud e Sant-Nazer. Desachet omp bet da gentañ gant an dud a vez an nebeutañ dindan evezh ar mediaoù hag ar muiañ war var d’o yec’hed : gopridi an embregerezhioù-se. Aet omp neuze da furchal dreist-holl e Chanterioù an Atlantel, kentañ implijer industriel, al labouradeg Yara hag ar burerezh TotalEnergies, an div lec’hienn rumm Seveso a vez evezhiet ar muiañ e Sant-Nazer.

Dre deir gwech hon eus bet kaset posteloù da servij kehentiñ ar Chanterioù, hep kaout tamm respont diganto. N’eo bet roet digor deomp war o «zachenn kelaouiñ», un dachenn a zo digor d’an holl gazetennerien, sañset. An den e-karg eus ar c’hehentiñ e purerezh Donez, diouzh e du, zo bet dereat a-walc’h da lâret deomp ne rofe respont ebet d’hor goulenn pennad-kaoz. Renerezh Yara Frañs hepken he deus asantet respont deomp dre bostel d’an heuliad goulennoù kentañ bet kaset dezho, met ket d’an eil.

Dre ma ne oa ket bet roet deomp kalz a ditouroù digant an embregerezhioù-se hon eus ranket diazezañ hol labour da gentañ war an testenioù ha dielloù bet pourchaset deomp gant sindikalourien hag implijidi, lod outo eil-kevratourien ha labourerien a-frapadoù. Gwelloc’h eo bet kavet gant lod outo chom dizanv evit reiñ o zesteni deomp, kuit dezho da bakañ rebechoù pe kastizoù digant o implijerien. Diouzh o zu, hini ebet eus medisined al labour – war al labour pe war o leve –, n’en deus fellet komz eus o buhez labour war ziazad Sant-Nazer.

« Pezh a eo en embregerezh a chom en embregerezh. N’hon eus ket ar gwir reiñ keloù da c’houzout », a zispleg e berr gomzoù ur chafoder a ro deomp e desteni eus an doareoù labour spontus hag eus ar saotradur a vez e labouradeg Yara.