Saotradur an aer gant amoniak : kit da welet penaos eo ar jeu en ho kumun
Juliette Cabaço Roger - 07/03/2024![](https://splann.org/wp-content/uploads/2024/06/Capture-decran-2024-06-27-a-10.39.27-600x398.png)
Da heul ar sevel listri eo erruet embregerezhioù industriel e-leizh d’en em staliañ e Sant-Nazer. Seizh outo a brodui pe stok danvezioù dañjerus evit an…
Talvoudus-meurbet eo kleuzioù ha girzhier gwalarn Frañs e-tal reuz direizhder an hin ha diskar ar vev-liesseurted. Padal e kouezh ar c’houst merañ war zivskoaz al…
Pell mat eo Cooperl hiriv an deiz diouzh ar strolladig 25 saver moc’h en deus savet anezhi. Deuet eo da vezañ ur gompagnunezh etrevroadel.
C’hoant zo staliañ mil labourer-douar ar bloaz a-benn 2028 e Breizh. Hiziv n’eus nemet 500 a zeu a-benn d’en em staliañ e-keit ma weler tiez-feurm…
Ur gaz a zeu dre vras diwar al labour-douar eo an amoniak. Pa vez mesket gant danvezioù all e tro da elfennoù moan hag a zo dañjerus-kenañ evit ar yec’hed. Breizh eo ar vro e-lec’h ma vez dilaosket ar muiañ a amoniak e Frañs, hag en Europa zoken. Abalamour ma ‘z eus kement a atantoù industriel da zesevel loened.
Pa vez sellet ouzh ar pezh a zo bet cheñchet er gartenn, n’eo ket diaes lâr n’eo ket bet cheñchet kalz ar jeu. N’eus ket kalz a gumuniezhioù kumunioù o defe digresket ar c’hementad a amoniak kaset en aer e-tre 2016 ha 2020. Padal e weler un nebeud outo a zilaosk muioc’h outañ. Gwelet e vez mat ar re a zo aet da ruz.
Setu ar pezh zo c’hoarvezet e Bro-Roazhon, war gumunioù evel Foûjere (Felger) pe Vitrë (Gwitreg) e lec’h ma weler ez eus bet savet atantoù desevel loened nevez, moc’h dreist-holl, pezh a lak ar saotradur da greskiñ. Ar memes tra a vez eus tu Dinan hag a zo tost a-walc’h eus Lambale (Lambaol), ul lec’h anavezet mat evit an desevel moc’h hag evit bezañ ti ar C’hooperl. E Penn-ar-Bed, ez eo bro Landerne a zo aet da ruz ivez. Ret eo lâr eo Bro-Leon e-lec’h ma vez ar muiañ a atantoù moc’h er Frañs.
Kumuniezh kumunioù bro Landivizio a zo just a-walc’h an hini a zilaosk ar muiañ a amoniak gant 646,3 tonenn, heuliet gant Montroulez Kumuniezh (349,1 tonenn), Loudia Kumuniezh-Kreiz Breizh (348,7 tonenn), Lambal Arvor hag Argoat (315,4 tonenn) ha Kumuniezh-kumunioù Pleiben-Kastellin-Porzhe (306,1 tonenn).
Un dra all zo bet cheñchet war ar gartenn : e Karozh, e Morbihan, e weler mat ur c’helc’h bras-abominapl. Setu ar c’hementad a amoniak dilaosket gant an SARL avicole du sous-bois, un embregerezh meur a atant ennañ. Ne veze ket gwelet war ar gartenn gentañ hon oa savet. Aze e weler splann ez eo bet dilaosket div wech muioc’h a amoniak e 2022 eget e 2018. Hag ouzhpenn ez eus atantoù all o tilaoskel amoniak tro-dro.
N’eo ket klok siwazh ar gartenn-mañ : an tiez feurm brasañ hepken a rank diskleriañ hoc’h amoniak. Hag ouzhpenn-se, gant lod ne vez ket graet. Da skouer, en hor c’hartenn gentañ e vije gwelet mat an Timac Agro, perzh eus ar strollad Roullier, un uzin produiñ temz war porzh Sant-Maloù (35). Met aet eo diwar-wel er gartenn nevez rak n’eo ket bet diskleriet an amoniak dilaosket nevez zo. Padal eo bet kondaonet an embregerezh evit bezañ bet saotret an aer hag an dour e miz Meurzh 2024.
E Montouer (Mouster-al-Loc’h, 44) ez eo ar c’hontrol. An uzin temz Yara a zo deuet da vezañ gwelus war ar gartenn abalamour m’ he deus diskleriet un nebeudig a amoniak. A-hed 20 vloaz eo bet kaset 2.748 tonenn a amoniak en aer ! Pa seller ouzh bro an Naoned ha Sant-Nazer e seblant bezañ mat a-walc’h kalite an aer. Estreget an uzin fardañ kouignoù, Mondelez, ne weler ket a embregerezhioù bras. Met ma lennit hon enklask diwezhañ e komprenit mat eo saotret-kenañ ar vro abalamour d’an industriezh a gaver eno.
E 2021 e oa bet embannet ganeomp un enklask bras diwar-benn saotradur an aer gant amoniak. Dre ar gartenn bet krouet ganeomp e c’hellit gwelet pet tonenn amoniak a zo en aer ho kumun. Nevesaet hon eus ar gartenn gant sifroù 2020 evit ar c’humunioù, ha gant sifroù 2022 evit an atantoù. Gall a reoc’h neuze zoomiñ war ho kumun evit gwelet pegen saotret eo an aer.
Lennit hon enklask diwar-benn an amoniak
Lennit hon enklask diwar-benn an amoniak
Resevit bep miz danvezioù nevez flamm dre vail ha bezit kelaouet eus hon enklaskoù nevez, e brezhoneg. Digoust eo !
En ur lakaat ma anv evit lizher-kelaouiñ Splann ! e asant din e vo implijet ar roadennoù personel am eus pourchaset (chomlec'h postel) da-ge