Essure : drouk mouget e korf ar merc’hed

Abaoe bloavezhioù e c’haller lenn testenioù merc’hed tapet fall o yec’hed goude bout bet lakaet an ensteudoù (implants e galleg) Essure. Hiziv an deiz e kendalc’h da lâret an embregerezh ‘neus gwerzhet anezho ‘n eus ket kudenn ebet gant an ensteudoù. Un diell eus ajañs ar yec’hed a lâr ar c’hontrol e 2017. Splann ! ‘n eus kavet anezhañ.

Kinniget e oant bet e-giz dazont an hilastalerezh (koñtrasepsion) peurbad. An ensteudoù Essure a oa bet lakaet da hogozik 200 000 maouez e Frañs etre 2002 ha 2017. An embregerezh amerikan Conceptus a oa bet o werzhañ anezho da gentañ. Da c’houde e oa bet adprenet en 2013 gant ar ramz alaman Bayer.

N’eus ket ezhomm lakaat an dud da gousket, na chom en ospital, an teknik-mañ a-benn dont da vezañ gaonac’h a oa an hini implijet ar muiañ e Frañs adalek 2009, hervez sifroù Renerezh hollek ar Yec’hed (Direction générale de la santé pe DGS). Mann nemet er bloavezh 2013 e oa bet lakaet 28 000 ensteudad gant ginekologourien ! En holl ec’h embann Bayer bezañ bet gwerzhet ur milion a ensteudoù dre ar bed, 240 000 e Frañs, al lec’h ma oa bet gwerzhet ar muiañ diouzh sellet ouzh an niver a annezidi.

Met buan-tre e sav mouezhioù maouezed da ziskuilhañ efedoù-all. Skuizhder, bezañ breviet betek ma n’heller ket bale ken, poan benn, poanioù liesseurt, diwadennoù, kudennoù neurologel… Hir eo al listenn ha start ober al liamm gant Essure. Hiziv eo bet tennet o uterus pe korzennoù an uterus d’un 30 000 maouez bennak e Frañs, pa ‘z eo an doare nemetañ da dennañ an ensteudad kuit. Da lâret eo 15 % ar re o doa dibabet an doare hilastaliañ peurbad-se. An darn vrasañ anezho ‘z a gwelloc’h gant o yec’hed kerkent ha tennet koulz lâret.

Bayer a zibab tennañ an ensteud deus ar marc’had gall en 2017, ha deus ar Stadoù-Unanet en 2018. An embregerezh liesvroadel ac’h embann ez eo abalamour da « abegoù kenwerzhel » ha nac’hañ a ra kement si a vefe gant ar produ. Koulskoude ez eus dielloù, e-kerz savour an ensteud hag ar pennadurezhioù yec’hedel, pere en deus gallet kaout Splann ! a lak abeg war surentez an ensteudad

Klikit amañ a-benn gwelet deiziadoù meur an afer

 

Breizhadezed o vountañ war ar pennadurezhioù yec’hedel

Un dezrevell tasmant gant an ANSM a lak douetañs war surentez an ensteud

Diwallerezh a-dreuz ar pennadurezhioù yec’hedel

Podkast : buhez torret ar merc’hed

Lennit an enklask e galleg

Boest du

E-pad an enklask omp bet o furchal en kantadoù a deuliadoù, hag o vont e darempred gant dekvedoù a dud. N’eus nemet un nebeud anezhe a zo bet meneget e lodennoù an enklask.
Savet hon eus goulennoù da Ajañs ar yec’hed, an ANSM, a zo e-kreiz an afer. Bet omp bet e darempred ivez gant ministrerezh ar Yec’hed, an embregerezh alaman Bayer, ha gant an aozadurioù o ‘deus roet ar siell CE da Essure, an NSAI ha Tüv Sud. Amañ dindan e kavit o respontoù a-bezh.

Petra eo hon youl ?

Falloc’h-fallañ ar jeu gant an endro er bed. Hag e soñj deomp eo ar c’hazetenniñ un ostilh da cheñch an traoù. Da dud ar vro da implij an titouroù embannet ganeomp a-benn bountañ war dilennidi ha kannaded

Gant Juliette Cabaço Roger, Faustine Sternberg, Rozenn Le Carboulec ha Guy Pichard eo bet graet an enklask-mañ. Bet skoazellet gant ar c’homite embann. Eno ‘vez kavet Gwenvaël Delanoë, Sylvain Ernault, Anne Kiesel, Raphaël Baldos, Juliette Cabaço-Roger, Faustine Sternberg ha Caroline Trouillet. Troet eo bet an testennoù gant Riwanon Kallag. An enklask-mañ zo bet embannet digoust a-drugarez d’ar mediaoù a genlabour ganeomp : France 3 Breizh, Ya !, Dispak, kelaouenn Elle, rouedad Radio Breizh, rouedad radioioù kevredigezhel, Frap ha Corlab.

Paeet eo bet al labour-mañ 100 % gant tud voutin, dre chekenn pe dre al lec’hien HelloAsso. Enklaskoù nevez ‘vo tu lañsan gant ar pezh ‘vo roet ganeoc’h. Tu zo tennañ an arc’hant roet diwar an talioù.

Ganeomp ne vo ket degemeret muioc’h a 10 % eus hon arc’hant digant ar memes kevredigezh pe aozadur : sed aze un doare da chom dieub ar muiañ posupl. Yalc’hadoù ivez na vezont ket digemeret ganeomp.

Koumanantit d'hon c'heleier

Resevit bep miz danvezioù nevez flamm dre vail ha bezit kelaouet eus hon enklaskoù nevez. Digoust eo !